၂၀၂၆ ခုနှစ် မတ်လ ၂၃ ရက်
ကမ်းခြေစောင့်တပ်ဖွဲ့ကွပ်ကဲမှုဌာနချုပ်ရှိ မှီခိုသူ ကျောင်းသား၊ ကျောင်းသူများ၏ စိတ်ဓာတ်၊ စည်းကမ်းကောင်းမွန်ပြီး မိမိကိုယ်ကိုခုခံကာကွယ်နိုင်စွမ်းများ တိုးတက်မြင့်မားလာစေရေးအတွက် အခြေခံကိုယ်ခံပညာများတတ်ကျွမ်းစေရန် ရည်ရွယ်၍ ၂၀၂၆ ခုနှစ်၊ မတ်လ ၁၆ ရက်မှ မတ်လ ၂၃ ရက်အထိ အခြေခံမြန်မာ့သိုင်းသင်တန်း၊ အမှတ်စဉ် (၁/၂၀၂၆) ကို မှီခိုသူ ကျောင်းသား၊ ကျောင်းသူ ၁၆ ဦးဖြင့် ဖွင့်လှစ်သင်ကြားခဲ့ပါသည်။
မတ်လ ၂၃ ရက်တွင် သင်တန်းဆင်းပွဲအခမ်းအနား ကျင်းပပြုလုပ်ပေးခဲ့ရာ ရှေးဦိးစွာ ကမ်းခြေစောင့်တပ်ဖွဲ့ညွှန်ကြားရေးမှူးချုပ်မှ အမှာစကားပြောကြားခဲ့ပြီး သင်တန်းသား၊ သင်တန်း သူများမှ စုပေါင်း၍ လည်းကောင်း၊ ၄ ယောက်တွဲဖြင့် လည်းကောင်း အခြေခံမြန်မာ့သိုင်း ၆၃ မောင်းအား သရုပ်ပြသခြင်း၊ ဓားလမ်းကြောင်း ၉ ချက် ရပ်လျက်သရုပ်ပြသခြင်းနှင့် လှုပ်ရှားမှုဖြင့် သရုပ်ပြသခြင်း၊ မြန်မာ့သိုင်းကိုယ်ခံပညာ အတွဲလိုက် သရုပ်ပြသခြင်းများ ပြုလုပ်ခဲ့ကြပါသည်။
ထို့နောက် မြန်မာ့သိုင်းသင်တန်းနည်းပြအဖွဲ့နှင့် သင်တန်းသား၊ သင်တန်းသူများအား ဂုဏ်ပြုချီးမြှင့်ငွေများ ပေးအပ်ခဲ့ကြောင်း သတင်းရရှိပါသည်။
